細個嘅時候，
父母親同兄弟姊妹就係我哋最親密嘅人
直到慢慢長大，
我真係聽過太多兄弟姊妹無情無義嘅故事
我發現所謂的兄弟姊妹，
有時候可以比朋友更加無情無義。
嗰啲兄弟姊妹間嘅友愛和平
有時候只係父母一廂情願嘅想像。
我成日同自己講，生兩個係可以一齊成長
但千其唔好有過多期望同幻想
覺得自己死後兩個人就可以互相依靠。
其實兩個人長大之後能夠做到互不拖累，已經係種福氣。
我婆婆有個細佬，生前賭錢成性
我婆我公生前幫佢還過好多債，
甚至我阿媽姨媽都有幫過手相助。
一人犯錯，全家受罪嘅故事真係一街都係。
啲人成日話「仔女係債」
我成日都覺得咁講其實唔係幾公平
因為當你遇到個唔好嘅家人，同樣係債。
嗰個可能係苛索你嘅父母，或者係拖累你嘅兄弟姊妹
同樣都可以係「債」。
我身邊好多朋友嘅兄弟姊妹都成咗家
好多人成家之後就會脫離原生家庭
原本屬於同一家庭嘅兄弟姊妹，都會分裂成各自家庭
然後各自都會以自組家庭嘅利益為首位
好多兄弟姊妹間嘅矛盾就會因此出現。
有時連朋友都做唔出嘅仆街事，反而兄弟姊妹會做得出
尋日同朋友傾開呢個話題，
佢話「兄弟姊妹其實只係share同一個子宮」
我同意。手足之情雖美好，但絕非理所當然。
仲覺得兄弟姊妹一定手足情深，
就如覺得仔女一定孝順父母，養兒可防老一樣
實在太傻太天真，亦太迂腐了。
我難以忘記之前有個讀者留言畀我嘅一句說話：
「有時，我會情願自己係個孤兒。」
未能明白家人帶嚟嘅災難，只係你嘅世界太幸福。
喜歡我的文字，請支持我的Patreon：
https://www.patreon.com/hkgirlfriend
**收入會將一半捐出支援被捕人士。
IG：@hkgirlfriend
FB：港女友
Search